KAMATI YA FEDHA,UONGOZI NA MIPANGO IMERIDHISHWA NA KASI YA UTEKELEZAJI WA MIRADI YA ELIMU NA AFYA

Imewekwa: January 30th, 2025

Kamati ya Fedha,Uongozi na Mipango ya Halmashauri ya wilaya ya Sikonge imeipongeza menejimenti kwa usimamizi wa miradi ya elimu na afya ambayo inatekelezwa katika maeneo mbalimbali kwa lengo la kusogeza huduma bora kwa wananchi wa wilaya ya Sikonge.

Hayo yameelezwa na Mwenyekiti wa Kamati hiyo Mhe.Rashid Magope wakati akihitimisha ziara ya siku mbili ya kukagua miradi mbalimbali ya maendeleo katika kata za Sikonge,Tutuo na Kitunda ambapo amesema kamati yake imeridhishwa na kasi ya ujenzi wa miradi ya elimu na afya.

“Tumejionea kazi nzuri ya mkurugenzi na menejimenti yake katika ujenzi wa mabweni 2 na matundu 10 ya vyoo katika shule ya sekondari Kiwele jambo linaloongeza hamasa ya kujisomea kwa wanafunzi huku wakiishi katika mazingira bora”Mhe.Magope.

Aidha Mhe.Magobe na kamati yake wamekitembelea kikundi cha ufugaji nyuki cha Kitunda Bee Product na kugawa mavazi ya kisasa ya kulinia asali pair 30 kwa niaba ya Mbunge wa Jimbo la Sikonge Mhe.Joseph Kakunda ambapo amesema kuwa mavazi hayo yatawasaidia vijana kufanyakazi kwa ufanisi na kisasa zaidi kwa lengo la kuongeza tija katika shughuli hiyo.

Naye Makamu Mwenyekiti wa kamati hiyo  Mhe.Gasper Lwambano ameipongeza halmashauri kwa kutoa shilingi milioni 20 kutoka katika chanzo cha mapato ya ndani kwa ajili ya kurekebisha miundombinu ya kupokea mashine ya X-ray katika jengo la mionzi.

“Mashine hii ya X-ray itawasaidia wananchi wetu ambao wanaenda mbali kupata huduma hii kwa fedha hizi za uboreshaji wa miundombinu ni ishara nzuri ya kuunga juhudi za serikali ya Rais DKT.SAMIA SULUHU HASSAN katika kusogeza huduma za afya kwa wananchi”Mhe.Lwambano.

Kaimu Mkurugenzi Mtendaji wa Halmashauri ya Wilaya ya Sikonge Ndg.Hashim Kazoka amesema kumekuwa na usimamizi wa karibu kutoka kwa wahandisi wa halmashauri katika miradi yote.

“Tunashukuru miradi yote inatekelezwa vizuri chini ya usimamizi wa wataalamu wetu ndiyo maana kamati imeridhishwa na maendeleo ya miradi” amesema Ndg.Hashim Kazoka.

Katika ziara hiyo ya siku mbili Kamati ya Fedha,Ungozi na Mipango imekagua miradi mbalimbali katika kata za Sikonge,Tutuo na Kitunda ikiwemo ujenzi wa madarasa mawili ya shule ya msingi Igalula pamoja na kiwanda cha kuchakata mazao ya asali ambacho tayari kimepata mwekezaji.