MKUU WA WILAYA YA SIKONGE MHE.CORNEL LUCAS MAGEMBE AMALIZA UTATA JUU YA ENEO LA MRADI WA UMWAGILIAJI UNAOTARAJIWA KUTEKELEZWA KATIKATI YA KATA ZA KITUNDA NA KILOLI

Imewekwa: January 29th, 2025

Na, Edigar Nkilabo

Mkuu wa wilaya ya Sikonge Mhe.Cornel Lucas Magembe amewataka baadhi ya wakazi wa Kata za Kitunda na Kiloli kutoa ushirikiano kwa wataalamu wanaofanya tathimini ya maeneo ya ujenzi wa bwawa na miundombinu ya umwagiliaji na kuwa tayari kuupisha mradi huo ambao unatarajiwa kutekelezwa katika kata hizo na tume ya taifa ya umwagiliaji.

“Mradi huu utachochea shughuli mbalimbali za uzalishaji ikiwemo uvuvi,kilimo cha umwagiliaji chenye tija na kuwaongezea kipato hivyo nitoe rai kwenu nyote hasa wenye mashamba katika eneo la mradi lililopendekezwa na wataalamu maeneo hayo hayapaswi kuendelezwa kwa namna yeyote ile kwakuwa tayari wataalamu wameanza kufanya tathimini”.

Kwa upande wake Diwani wa kata hiyo Iddi Juma Malole amesema mikutano ya Kijiji ilifanyika na baadhi ya wananchi walihudhuria kwenye mkutano na kuelezwa juu ya mradi huo wa Kalupale ambao unatekelezwa Katikati ya kata za Kitunda na Kiloli.

“Baadhi yetu tulihudhuria mkutano Meneja wa Tume ya Umwagiliaji  mkoa wa Tabora alieleza vizuri sote tukamuelewa na kuukubali mradi kwa mikono miwili haya mengine yanayotokea hayana mashiko wananchi na mimi diwani wao tuko tayari kwa mradi”

Naye Katibu wa CCM kata ya Kiloli Kedmon Chikoti amempongeza Mkuu wa wilaya ya Sikonge  kwa kusimamia vyema utekelezaji wa ilani ya Chama Cha Mapinduzi katika miradi mbalimbali ikiwemo ujenzi na ukarabati wa miundombinu ya Barabara pamoja na kusikiliza kero za wananchi na kuzifanyia kazi kwa wakati.

Katika ziara hiyo sambamba na kuzungumza na wananchi, Mkuu wa wilaya Mhe.Magembe amefanya mkutano na walimu wa shule za Msingi na Sekondari wa kata za Kitunda na Kiloli wakijadili mbinu na mikakati ya kuongeza ufaulu katika kata hizo.