WATUMISHI WA HALMASHAURI YA WILAYA YA SIKONGE WASHAURIWA KUJIANDAA KUSTAAFU.

Imewekwa: October 21st, 2021

WATUMISHI WA HALMASHAURI YA WILAYA YA SIKONGE WASHAURIWA KUJIANDAA KUSTAAFU.

Akiendelea na ziara katika kata za: Chabutwa, Ipole  na Ngoywa, Mkuu wa Idara ya Utawala na Rasilimali watu(W) Nico Kayange amewaasa watumishi wa Umma walio katika Wilaya hiyo kutumia vema nafasi za utumishi walizonazo kwa sasa ili waweze kujiandaa vema kustaafu wakiwa na uhakika wa kuishi maisha bora baada ya kustaafu nafasi hizo.

DHRO Kayange ameyasema hayo  alipozungumza na watumishi wa Umma ikiwa ni  mwendelezo wa ziara ya Mkurugenzi Mtendaji (W) kuwatembelea watumishi wote wa Halmashauri ya Sikonge akisikiliza *kero* zao pamoja na kutoa maelekezo na maagizo ambayo watumishi wanapaswa kuyazingatia wanapotoa huduma bora kwa jamii."Fedha za kustaafu sio za kukopesha na kufanyia miradi mikubwa badala yake ni vema kuwekeza kwenye HISA ..kwa hiyo jiandaeni kustaafu vyema, Jiandaeni Kisaikolojia kuuacha Utumishi wa Umma...sio mstaafu unamkuta baada ya muda mfupi tu wa kustaafu anageuka ombaomba....ni kuaibisha utumishi wa Umma" DHRO Kayange.

Akijibu  kero  mbalimbali za watumishi ikiwemo upungufu wa watumishi, kufutiwa barua zao za kupandishwa vyeo kwa mwaka 2016 na 2021, baadhi ya watumishi kutotimiza wajibu wao, Mapunjo ya mishahara kutolipwa hadi sasa kero ambazo zimeanza kutatuliwa ikiwemo  mapunjo ya Mishahara kuanzia Mwaka 2013 hadi 2020, DHRO Kayange amesema  Serikali imetoa fedha zaidi ya Tsh.Milioni 500  kuwalipa mapunjo ya mishahara watumishi(659) wa kada mbalimbali na tayari wamelipwa.

Aidha DHRO Kayange ameongeza kuwa  zaidi ya watumishi (865) mapunjo yao ya mishahara yamewasilishwa kwa Katibu - Mkuu - Utumishi kwa ajili ya  kuchambuliwa ili fedha ikipatikana watumishi hao waweze kulipwa.

Katika hatua nyingine Kaimu Mkuu wa Idara ya Afya, Dkt.Grace Molel ametumia fursa hiyo kuwahamasisha watumishi kuchanja chanjo ya UVIKO-19 kwa ajili ya kulinda afya zao na kuwalinda wengine ikiwa ni sehemu ya mapambano dhidi ya Ugonjwa huo.

Na.Anna Kapama.