WATUMISHI SIKONGE WAPATIWA MAFUNZO YA MFUMO MPYA WA MANUNUZI YA UMMA KWA NJIA YA MTANDAO (NeST).

Imewekwa: October 3rd, 2023

Mafunzo hayo yametolewa leo katika ukumbi wa Halmashauri ya Wilaya ya Sikonge yakiongozwa na wataalam toka vitengo  na divisheni mbalimbali waliohudhuria mafunzo hayo ya mfumo mpya wa manunuzi katika ngazi ya mkoa.

Akitoa mada katika mafunzo hayo Kaimu mkuu wa kitengo cha Usimamizi wa Manunuzi na Ugavi  Bw. Revocatus Shaban amesema mfumo huu mpya wa NeST utasaidia kudhibiti rushwa na uwazi usioridhisha katika mchakato wa zabuni serikalini pamoja na kupunguza matumizi ya karatasi nyingi katika ujazajaji wa fomu mbalimbali wakati wa mchakato wa manunuzi(paper work).

Lakini pia mfumo huu mpya wa manunuzi ya umma kwa njia ya mtandao  (NeST) utasadia kutatua changamoto zilizojitokeza katika mfumo wa zamani wa manunuzi wa TANePS,ambao ulianza kutumika  mwezi Januari 1,2020.

Kuanzia tarehe 1 Oktoba manunuzi yote ya umma yatafanyika kupitia mfumo mpya wa NeST.NeST itasimamia usajili,zabuni,mikataba,malipo,katalogi pamoja na minada kwa njia ya mtandao.