WAKULIMA NA WAFUGAJI WATAHADHARISHWA JUU YA UWEPO WA MVUA ZA CHINI YA WASTANI MWAKA HUU

Imewekwa: November 13th, 2025

Na Edigar  F. Nkilabo – Sikonge DC.

Kufuatia taarifa ya Mamlaka ya hali ya hewa Tanzania TMA kuwa baadhi ya mikoa ikiwemo mkoa wa Tabora, Mkuu wa Divisheni ya Kilimo,Mifugo na Uvuvi Ndg.Aldo Mwapinga amewataka wakulima nchini kuzingatia ushauri wa wataalamu wa kilimo ikiwemo kupanda mazao yanayostahimili ukame.

Ndugu Mwapinga amesema hayo wilayani Sikonge baada ya taarifa ya TMA ambapo amesema wakulima wanapaswa kuzingatia ushauri wa wataalamu ili mvua za chini ya wastani zitakazonyesha ziweze kuwanufaisha.

“Tunawasisitiza wakulima wetu kutumia vyema mvua zitakazonyesha kwakuwa zitakuwa chini ya wastani mazao yanayostahimili ukame na kutumia unyevu mdogo ndiyo suluhisho pekee kwa mwaka huu na katika kulifanikisha hili, wataalamu wetu watapita kata moja baada ya nyingine kwa ajili ya kutoa elimu na ushauri kwa wananchi” amesema  Ndg.Mwapinga.

Aidha Mkuu wa Divisheni hiyo Ndg.Mwapinga amesema suala la mvua za chini ya wastani athari zake zitawagusa wafugaji pia hivyo wanapaswa kupunguza makundi ya ng’ombe na kubakiza mifugo ambayo itakidhi malisho yaliyopo.

“Kwakuwa athari za mvua chache zinagusa makundi mengi ya watu na kuathiri shughuli mbalimbali basi wafugaji nao wachukue tahadhari maana malisho yatapungua katika kipindi hiki hivyo nawasihi wapunguze idadi ya mifugo wabaki na ile inayoweza kukidhi malisho yalipopo”