“LENGO LETU KUBWA NI HILO KUHUDUMIA WATU”.DED PANDAWE.

Imewekwa: October 9th, 2023

Hayo yamesemwa leo katika kikao cha watumishi wa Makao Makuu ya Halmashauri ya Wilaya ya Sikonge na Mkurugenzi  Mtendaji  Ndg. Selemani Pandawe alipokuwa akiongea na watumishi hao katika ukumbi wa halmashauri.

Aidha watumishi hao wakiwasilisha kero kwa Mwenyekiti wa kikao hicho ndugu Pandawe,wamelalamikia kutofanyika kwa  vikao vya idara na divisheni katika maeneo yao hivyo kuleta sintofahamu ya mambo mengi ambayo kwa kufanyika vikao hivyo yangepatiwa  majibu na kupunguza  au kuondoa kabisa kero hizo.

Naye Mwenyekiti akijibu juu ya kero hiyo iliyoonekana kuwa ya jumla amesema Wakuu wa Divisheni na Vitengo wanapaswa kukaa vikao na watumishi wao kila mwezi kati ya tarehe 20 hadi 30 na mihtasari ya vikao hivyo iwasilishwe  kwa Afisa Utumishi kwa ajili ya ufuatiliaji.

Kwa upande wake Mkuu wa Divisheni ya Utawala na Rasilimali Watu, Ndg. Nico Kayange amesisitiza juu ya watumishi wa umma kuzingatia sheria na kanuni za utumishi hasa katika suala zima la mavazi, kwa kuvaa nguo zenye staha na nadhifu.

Akifunga kikao hicho Ndg. Pandawe amesisitiza watumishi wote kuzingatia sheria kila mtu katika eneo lake lakini pia kutunza siri za serikali wanazopata kuzifahamu kulingana na majukumu yao ya kila siku.