KAMATI YA FEDHA UONGOZI NA MIPANGO YAKAGUA MIRADI YA MAENDELEO: UJENZI WA SHULE, OFISI ZA KATA NA MIUNDOMBINU YA AFYA SIKONGE.

Imewekwa: September 2nd, 2024

Kamati ya Fedha, Uongozi na Mipango ya Halmashauri ya Wilaya ya Sikonge ikiongozwa na Mhe. Rashid Magope,Mwenyekiti wa kamati hiyo imefanya ziara ya ukaguzi wa miradi ya maendeleo kwa kipindi cha robo ya nne. Ziara hiyo ililenga kukagua maendeleo ya miradi mbalimbali na kuhakikisha matumizi sahihi ya fedha za umma yamezingatiwa.

Katika ukaguzi huo, kamati imepitia mradi wa ujenzi wa shule mpya ya msingi katika eneo la Ukanga, ambao umegharimu shilingi milioni 60. Ujenzi wa shule hii unatarajiwa kuboresha upatikanaji wa elimu na kutoa mazingira bora ya kujifunzia kwa watoto wa eneo hilo.

Aidha, kamati imekagua mradi wa ujenzi wa njia za watembea kwa miguu (walkways) katika hospitali ya wilaya ya Mlogolo. Mradi huu, ulio na gharama ya shilingi milioni 100, unalenga kuboresha miundombinu ya hospitali na kuwezesha huduma bora kwa wagonjwa na wahudumu.

Mradi mwingine uliozingatiwa ni ujenzi wa ofisi ya kata ya Tutuo, ambapo gharama zake ni shilingi milioni 10. Ofisi hii itasaidia kuongeza ufanisi katika utendaji wa shughuli za kata na kuboresha huduma kwa wananchi wa eneo hilo. Kamati pia ilipitia ujenzi wa ofisi ya kata ya Mpombwe, ambayo imegharimu shilingi milioni 15. Ujenzi huu ni sehemu ya juhudi za kuboresha utawala na huduma za kata hiyo.

Kwa upande wa miradi ya afya, kamati imekagua ujenzi wa kichomea taka pamoja na tanki la ardhini la kuhifadhia maji, miradi ambayo imegharimu shilingi milioni 32. Miradi hii inalenga kuboresha usafi wa mazingira na usimamizi wa rasilimali za maji katika kata hiyo.

Ziara hii ya kamati imelenga kuhakikisha kuwa miradi inatekelezwa kwa viwango vya juu na kwa matumizi bora ya fedha za umma. Kamati imeonesha kuridhishwa na maendeleo ya miradi, huku ikitoa maelekezo kwa maeneo yenye changamoto ili kuhakikisha kuwa malengo ya miradi yanafikiwa kikamilifu.