MKUU WA MKOA AZINDUA BARAZA LA BIASHARA WILAYANI SIKONGE.

Imewekwa: August 11th, 2021

MKUU WA MKOA AZINDUA BARAZA LA BIASHARA WILAYANI SIKONGE.

Na.Anna Kapama

Mkuu wa Mkoa wa Tabora Balozi Dkt.Batilda Buriani amezindua Baraza la Biashara la Wilaya ya Sikonge na kuzungumza na wadau na wafanya biashara .

Akitoa hotuba wakati wa uzinduzi Balozi Dkt. Batilda amesisitiza ushirikiano kati ya Sekta Binafsi na Sekta  ya Umma ili kwa pamoja waweze kutekeleza malengo ya Baraza hilo,

Aidha  Balozi Dkt.Batilda ameitaka Halmashauri kuingiza shughuli  za baraza hilo  katika bajeti  ya Halmashauri pamoja na  kuweka mpango mkakati kuendeleza viwanda,Biashara  kupitia mpango mkakati wa Mkoa.

Sambamba na hilo Balozi Dkt.Batilda amesema muongozo wa uwekezaji wa Mkoa uchambuliwe ili kupata muongozo wa Wilaya na wananchi wajulishwe yanayotakiwa kufanyika kuinua uchumi huku akiongeza kuwa Baraza la biashara lifanyike Mara nne kwa mwaka likizingatia  Sheria,kanuni na taratibu zilizowekwa.

Akisoma taarifa ya baraza hilo Mkurugenzi Mtendaji Wilaya ya Sikonge Ndg.Selemani Pandawe,amesema madhumuni ya baraza hilo ni kuwa na jukwaa la majadiliano kati ya Sekta binafsi na Sekta ya Umma ili kuboresha mazingira ya biashara na uwekezaji sambamba na kupunguza gharama za biashara nchini ili kuwavutia wawekezaji wa ndani na nje ya nchi.

Baraza hilo la wafanya biashara lenye wajumbe arobaini(40) kutoka Sekta binafsi na Sekta ya Umma linalenga kutekeleza majukumu mbalimbali ikiwemo  kutengeneza mazingira bora ya kufanya biashara na uwekezaji, kuibua fursa za uwekezaji na kuboresha utoaji huduma.